Isettande s’incras de Giangavino Vasco a contivizu de Domitilla Mannu
Lestra est andande s’ora;
pagu tempus bi mancat
a cando custa carre m’an a abberrer.
Intr’ ‘e custa dimora,
ch’onzi gosu mi tancat,
chirco unu sinnu ‘e su chi dia cherrer.
Unu sinnu ‘e s’ispera
chi forte che’ sa fera
mi potat cussa janna manna abberrer,
po ch’intret cussa lughe
ch’illèbiet su pesu ‘e custa rughe.
Corcadu in custu lettu
intr’ ‘e custu ispidale,
tristos mi colan milli pensamentos,
cun in coro s’apprettu
de cumbatter su male
chi mi prenat cust’ànimu ‘e lamentos;
e chirco sa manera
de mantenner s’ispera
atzesa, in mesu a tottus custos bentos
chi sulan pius forte,
trazandemiche in mesu ‘e custa sorte.
Ma una fortza noa
in coro m’est naschinde
chi mi mustrat s’incras isperanzosu,
e bio chi sa proa
fortzis la so ‘inchinde
e torrare a proare apo su gosu.
Ma m’intendo ch’istraccu,
so de sonnu teraccu,
tuccat chi m’abbandone a su reposu.
Sos ojos serro e dromo,
sonniàndemi sanu torra in domo.
Giangavino Vasco
30 marzo 2012
4°Premio ex aequo alla 53a Edizione del “Premio Ozieri di Letteratura Sarda” – OZIERI 29 settembre 2012
