Sa Mesa de su Segnore di Domitilla Mannu
Como trint’annos, umpare a àteras pessones, faghio parte de sa tropa de su “Manzanile dominigale”, una trasmissione de radio in limba sarda, chi fit istada ammanizada, dae sa finitia de sos annos setanta, dae Zuanne Pedru Marras, mezus connotu comente “Zampa”. Apo comintzadu tando a acabidare cantones e pregadorias de sa tradissione nostra. M’ammento chi calchi iscultadore m’imbieit calchi cantone, nde cherzo ammentare nessi unu de custos; Biglianu Branca de Sennaru, unu poete de vaglia, chi nos at lassadu degh’annos como. In s’andare de su tempus apo coglidu, a boltas rezistrende, àteras boltas iscriende una cantidade bona de custas testimonias de sa cultura populare sarda, massimu a totu de su cabu de susu. In Tzaramonte ap’àpidu sa fortuna de connòschere a tia Nenarda Porcheddu, chi mancari esseret gia betza, aiat una bona retentiva e m’at contadu contos meda e resadu unas cantas pregadorias. In su tempus, las amus a publicare totu.
Sa mesa de su Segnore
Pro me est aparitzada,
De anghelos inghiriada
De anghelos pro servire.
Diciosa cudda die
Ch’ap’ a esser lìmpia e pura
E ap’ a andare segura,
Chena ingannu
No bi nd’at àteru pius mannu,
De alta nobilesa
De giòmpere ai custa mesa
De su re.
Ite grandesa est pro me
De m’ider cumbidada
Ai cudda mesa sagrada,
De su chelu…
Babbu amorosu e beru
No mi bastat su coro,
Pro retzire su tesoro chi mi donas
E so segura chi perdonas
E so lìmpia in su totu.
E deo cun coro devotu
Naro mischina a mie
Chi apo ofesu a tie.
No tenzo meressimentu,
Siat laudadu su Santissimu Sacramentu.
Tia Nenalda Porcheddu fit una femina meda trabagliadora, da cando faghiat die finas a sero. Su maridu, tiu Peppeddu Iddau, unu grande comunista de Tzaramonte, a ciarras, sonaiat in sos sotzios sa fisarmonica e calchi ‘olta cando nde li ‘eniat gana andaiat a su campu de Othieri a piscare pische ambu. Sa muzere s’ìscura trabagliaiat che un ainu, su maridu fit naschidu pro sa musica e pro atzantarare sa muzere cando issu e totu torraiat a domo imbreagu che supa. Sonade tiu Pepe’ e gagliadebos mudu! (Anghelu)
