Paginas de Pedra di Franco Piga a contivizu de Domitilla Mannu
Ap’intesu de pedras ch’an memoria,
sas chi mustran chentza coro e fritas,
nachi an sonos, peraulas iscritas,
figuras pintas, caras e ammentos,
e chi lugan cun s’abba e a sos bentos
cunfiden sos segretos de s’istoria,
e ch’in sos muros de pedra assentada
chi manos agalladas nd’an pesadu,
bi lugat su suore ch’an lassadu
cazadu in pizos diligos e canos,
in paginas de antigos iscrianos
che liberos de pedra ammuntonada,
inue b’an signadu ogn’argumentu
chi tempus e natura an preservadu,
a mustrare it’an fatu e manizadu
su Deus ch’an pregadu e beneitu,
sas domos chi tenian pro abitu
trastes, capatzidades e talentu.
Picadas pro bellesa e cumpagnia
sun de pedra sas lughes in sas losas,
e de pedra sun anghelos e rosas
chi signalan, che lacanas arcanas,
sa sorte e sas miserias umanas,
sa fine ‘e ogni dolu e disanìa.
Paren chi sigan, mudas a mustrare
operas cun inventos e fainas,
e chi rocalzos cun sas muridinas
ammuntadas de rù, edra e cresuras,
s’ispanten e si gosen de premuras
chi tropu an imbaradu a lis torrare.
