Accademia sarda di storia di cultura e di lingua

Gherras de paghe de Franco Piga a contivizu de Domitilla Mannu

 Franco Piga est nàschidu in Romana in  su 1955, inie ch’at coladu sa pitzinnia fintzas a cando no l’est tocadu de si nch’andare a Tàtari pro cumprire a istudiare. At trabagliadu in Portu Turres e cando est comintzada sa crisi de s’industria, est tucadu a trabagliare a s’estero.  At fatu isperièntzias de importu in medas logos de Africa e de Europa. In su 1983 torrat in Sardigna e s’aposentat in Olbia, inue trabagliat pro vint’annos in sa Cumpagnia Aerea comente Sistemista Informaticu. Est istadu sempre apassionadu de sa poesia e de sa cultura sarda, ma est ebbia dae unos cantos annos chi  leat parte a sos cuncursos literàrios, in sos cales est unu de sos poetes pius pretziados e premiados. In su mese de martu de ocannu s’ Amministrassione de su Comune de Loiri, ( sa bidda inue istat) l’at pubblicadu su libru tituladu “PAGINAS DE PEDRA”, chi est su resumu de sas isperièntzias de sa vida sua, de s’amore pro sa Sardigna e pro s’umanidade; est un’amore espressadu cun sensibilidade e dilighia de abberu raras.  Est un’òmine de cultura, est modosu e cumpridu e fintzas pro custas dodes est istimadu dae cantos ant s’onore de lu connòschere.

GHERRAS DE PAGHE                     de Franco Piga de Romana

Manos de lughe tia cherrere
pro picare pedras de sole
in manzanos de cuncordu
e laorare semenes de cunfortu
in ereminzos solianos.

Manos potentes tia cherrere
ch’assupran sufferentes,
e pinzellare lughe
in caras aumbradas,
gai ch’ iscanzen a su risu
laras serradas
chi rantziore an sutu
in notes de piantu.

Manos mannas tia cherrere
chi cumanden su ‘entu
pro chi, amigu, carret
nues e dies selenas
chi disanias istuden
e a festa sonen a repicu sas campanas.

Manos caldas tia cherrere
pro intessere tramas de istima
chi su mundu totu, lighen
cun sentidos de rispetu,
inue, s’isetu de su crasa
non siat timoria, ne apretu.

Manos giustas tia cherrere
pro aberrere jannas serradas
chi innotzentes isserran,
e pro iscriere cantones
de libertade, de veridade.

Manos diligas tia cherrere
pro carignare caras innotzentes
de criaduras
lassadas chentz’amore,
caras de mamas, de muzeres
chi pregan, isetende
chi finan sas ” Gherras de paghe”.

Manos tia cherrere
chi amigas astringan ateras manos.

Mentzione de onore   Premiu de poesia Circoscritziones  Li Punti- Latte Dolce  2011