Pro te hapo disizadu de Giuanne Soro
Pro te,babbu, hapo disizadu
beraniles chena muros
semenados e arveghes
e anzones biancos
e boes rassos e restes nieddas
e veridades in fiores allentoridas,
chelos giaros, frinigheddas de abba
e albores chena fine.
Si t’ammentas, babbu, hapo disizadu
su montiju affumadu
garrigu de nues,
cando su fogu
distruiat su masone.
Sa funtana ‘e s’allegria
hapo disizadu,
cun buttios sonende
a ripiccu subra roccas,
ingranidas de disperu,
cando sas chimeras cunzetas,
naschidorzas morian.
Su caminu de su ‘ighinadu,
attraessadu da-e omines
bestidos de paghe
hapo disizadu,
cando sa notte isparghiat muilos
de tempestas traitoras
subra su coro ‘e su mundu.
Ite no hapo disizadu, babbu!
Su tempus nos hat distruttu…
e tue ses mortu
in s’isettu ‘e sa lughe
de su manzanu bramada,
in d’una notte isteddada.
…E so restadu a piangher,
a piangher sos disizos
de sa vida tribulada
chi promittit avreschidas
seguras.
