In s’Italia coment’in Funtanedda de Anghelu de sa Niéra
A Tzaramonte b’at una funtana, pesso de sos primos annos Noighentos, chi est siguramente de restaurare bidu ch’est unu monimentu istoricu. Inie sas giajas nostras andaiant a samunare sos pannos brutos e in su matessi tempus si samunaiant sa buca cun sos loroddos subra sas istorias pius curiosas de sa idda. Bi fit chie faeddaiat de comare Gianna Coscilestra e chie de compare Pedru Fiagosu; chie faeddait de sas santicas chi faghiant sas santas in cheja e sas loroddosas in piata. De su restu, bidu chi fint samunende in aba fritta non si servaiat nisciunu dae sas ciarras, loroddos o lendas comente narant a Mores, dei custas feminas de bonas fainas.
S’argumentu pro totu riguardaiat s’omine o sa femina dae chintu in gioso, pruite totu fit de ischire cun chie custas feminas “malas” aiant fatu baratu de amore, si lu podimus narrer amore. Chie fit s’omine chi fit giompidu a cudda o s’atera femina, chie fit sa femina chi aiat dadu acontu ai cuddu o a cudd’ater’omine. Sos nobiles, fimus ancora in monarchia, che passaiant pro primos e pustis sos ricos mannales finz’a arrivire a s’omine pius mischinu de sa idda. Meda bortas pasaiant in sedatu finza sos preideros e i sas monzas. Pariat chi sa cosa pius importante diat esser istadu su “faghe faghe” intro sas domos, in sas chijuras, in sas concheddas, in sas binzas, in sos ortos, suta sas arvures, in su monte, in s’adde, e menomale chi non che passaiant puru sos angelos de chelu chi pro fortuna non ant corpos de istellare. Subra custas cosas non si daiat su bandu, anima mia libera, totu sas feminas naraint, pro la finire e si pulire sa buca prima de lasare sa funtana. Pustis amus fatu progresu e a samunare sos pannos bi sunt sas samunadoras a motore e gai sas feminas ant finidu de samunare sos pannos isoro e de sos ateros in Funtanedda.
Sigomente però s’omine e sa femina nd’ischint una pius de su dimoniu, allu eco chi ant inventadu sos giornales comente si narant in italianu o sos diarios comente si narant in ispagnolu. E gai ogni santa die chi nos mandat Deu, esint sos giornales e est comente torrare a Funtanedda. E si tue los comporas intrat in domo tua ogni loroddu e sa cosa più lestra est però sa televisione inue si faghent che i sa giota omines e feminas. Atere che Funtanedda. In custas dies poi semus sighende a puntadas totu su bagasumine de su presidente de sos ministros chi nos guvernat, s’idet chi primmu sos ministros, totu democristianos, no aiant ite fagher cun sas feminas ca fini m…mortos, como malannu sunt totu m…bios. Cuddos de s’opositzione de su restu, siat nadu a gloria isoro, sunt ancora m… mortos. E primmu sas feminas malas, anima mia libera, pro non narrer bagasas, istaiant mudas como però faeddant e faghent puru sa cunferetzia-istampa, de cale istampa si tratet siguramente non l’amus a ischire mai, ca no giuat a narrer custas cosas de funtana. 
Deo pesso chi totu, giornalistas o diaristas, si siant lende meda su culu a giogu. S’Italia, l’amus sempre nadu e sempre l’amus a narrer est una grande Natzione e da innoghe a duos meses iscomintzat sa festa pro sos chentuchimbant’annos dae s’Unidade e est pro custu chi si faeddat de sa bandela, de s’economia, e de totu cuddas cosucias chi pagu nos tocant. S’importante est de ischire ite malasorte faghet custu presidente m…allegru, ca si fit istadu m… mortu no fit balidu a nudda e sos diaristas de ite aiant potidu iscriere, de su boje chi los isconchet? Tralla lera, trali, lari lallera, tralla lera trari, tra ri lallà.
