Iscriere in prosa sarda non est fatzile de Anghelu de sa Nièra
Iscriere in limba sarda, subra totu in prosa, no est tantu fatzile. Su motivu printzipale nde benit dae sa mancantzia de unu corpus scriptorum de onzi tempus e pustis sos scriptores e i sas oberas chi amus a betada de manu las amus o in sardu logudoresu (sa Carta de logu d’Eleonora d’Arborea, sos condaghes, sas visitas pastorales, sos chimbe liberos parrochiales, sas deliberationes de sa republica de Thatari,sos istrumentos notariles, sos istatutos de Tathari e chentu ateros documentos chi manu manu sunt benzende a pizu)o in sardu campidanesu (comente meda ateros iscritos chi manu manu sunt benzende a pizu issos puru).
E custu est gia unu problema de isciovere pro sos iscritores in limba sarda. S’atera chistione sunt sas contaminationes conoschidas dae s’italianu, dae su castiglianu, dae su cadalanu e dae sos ateros limbarzos chi manu manu l’ant contaminada. Ca, a mie paret, chi sa limba sarda-che totu sos limbarzos-immaculada non est istada mai, ca at mandigadu pane dae sete furros, anzis l’an custrincta a mandigare.
A custas chistiones b’est pustis de annanghere dae cale limba umprire cando nos mancat una peraula culta, dae su latinu o dae s’italianu? Sighimus s’iscola de Sevadore Cossu e de Juanne Ispanu o intamen dae s’italianu comente narant ateras concas de ou pro la narrer a s’americana?
Su fatt’istat chi unu chi cheret iscriere in prosa sarda leat inue cheret s’importante chi epat s’ispiratzione si si tratat de unu contu e s’inteligentzia e sa cultura si si tratat de una cronaca o de ateras scientias. Assafines deo pesso chi como sos ditzionarios bene o male los amus e pertantu si unu cheret iscriere in prosa sarda calchi acorru l’agatat. S’importante est a si sutammitere a chi n’ischit prus de a nois. E nois iscurigheddos sa mastra gia l’amos. Deo pesso chi no at a passare mancu un’ora chi issa s’at a faghere intendere puru s’est passende unu momentu feu!
