A Giuanne Seu di Antonino Mureddu
Antonino Mureddu è nato a Chiaramonti il 1.12. 1927 da Sebastiano e da Giovanna Maria Migaleddu. Ha frequentato le scuole elementari a Chiaramonti sotto la fascistissima maestra Pisanu e la più più moderata maestra Cargiaghe, entrambi di Nulvi. Successivamente a 11 anni seguì il padre nella località Suelzu sulla strada per Ozieri “dae cussu momentu apo fatu su pastore e su messaju finza a 23 annos e pustis mi so isposadu cun Rosa Migaleddu de 16 annos e ap’appidu una cumpagna maravizosa e tres fizos: Buccianu, Gianne Mariu e Marcu.
M’apo leadu unu teracheddu pro ajuare a muzere mia e deo ch’imbrocaio cun d’unu ju e unu carru in su campu de Othieri a carrare sa paza dae sa trebbia. Sa paga fit talmente ona chi ogn’annu faghio una comporedda de terrinu: batoro e chimbe etareddos s’annu. Cando mi so ritiradu dae pastore aio 75 ettaros de terrinu cun 22 bacas e 150 aveghes e una bindichina de porcos. Apo dadu totu a fizos mios, sistemados duos in sa Forestale e unu in s’Aeroporto de Novara. Apo chimbe nebodennos: tres mascios e duas feminas. Comunque apo continuadu a tribagliare ortos e frutedos e oliarios pro aere sempre calchi cosa de faghere e pro arrutundare sa pentzione. Apo fraigadu un apartamentu peromine a fizos mios senza contare s’appartamentu meu. Tota sa vida mi so apretadu a fagher versos in limba sarda. Apo partitzipadu a meda concursos de poesia e apo una cascetedda piena de versos. Como prima de morrer las chelzo prubbicare in internet gai mi connoschet finza su mudu.”
Sa tantu istimada idda mia
partorid’at a Giuanne Seu
su mastru veru de sa poesia.
Sos palcos de Sardigna tot’arreu
as calcadu guasi sessant’annos
cun d’una carriera senza neu.
In d’ogni logu as balanzadu pannos
mantenzende in altu tant’onore
a su livellu de sos poetas mannos.
E in buca de ogni bravu cantadore
intes’amus sas tuas poesias
ch’a s’Elicona aggiuntu an valore.
As cantadu tristura e allegrias
sonettos bellos, mutos de amore
ch’in eternu an a restare bias.
D’esordiu e temas triunfadore
no as timidu berritas giradas
ca fis un abile improvvisadore.
Modas pro santos e santas cantadas
las as ca ischias bene s’istoria
chi enian in silentziu ascultadas
De te nos restet sempre sa memoria
chi custa zente sa fortuna at tentu
sa idda de Tzaramonte at tanta gloria.
Tue tenias grandu su talentu
ma como chi nos as abbandonadu
tristu e isconsoladu amus s’ammentu.
Un annu e duos meses ch’at passadu
da-i cando su Deus soberanu
a su fiancu sou t’at giamadu.
Dae su chelu danos una manu
chi sian bias sas traditziones
che rosas fioridas in beranu.
T’immortalamus in custas cantones
cun sas lagrimas chi falan a rios
dae sos ojos da tantas persones.
Giuanne nos at dadu sos adios
t’ammento che soldadu valorosu
non ses pius in su regnu de sos bios.
…e como drommi s’eternu reposu.
Pro Giuanne Seu
Dae minore a mannu ses bistadu
fatende su messaju cun suore
e pustis mannu ses diventadu
e unu grandu imprivisadore.
Oe su comune t’at puru regaladu
una targhetta a titulu de valore.
Creo chi non siet cosa fea
si t’onora sa idda totu intrea
Sa oghe tua fit una bellesa,
apende brios e fortzas in manu
connotu t’ana puru in Campidanu
e in tota sa provintzia tataresa.
A Nugoro e fintza in Oristanu
In s’esteru sa oghe tua s’est intesa.
A poetas mannos paradu as sa fronte
onorende sa idda de Tzaramonte.
Sa pro loco e su comune Giuanne a tie
chi pro ammentu a fizos tuos resta (t)
dende a tie su massimu valore
su vintabattoro de lampadas sa die
cun custu comitadu in custa festa
una targa t’amus fatu pro s’onore.
Fisti messaju de bona volontade
tribulende cun suore e magolzu
ponende sas fadigas totu a pala.
Peri sas tancas andende a laorare
seminende trigu fena e alzu
cun pagu profitu pro s’annada mala.
Abbandonende arados, boes e fuete
cussa idea brava e benigna
dende a totu su massimu valore.
Pro nois diventatu se poeta
fentomadu in tota sa Sardigna
dende a Tzaramonte tantu onore.
Chiaramonti, 23 giugno 1999
Antonino Mureddu è nato a Chiaramonti 83 anni fa e qui è sempre vissuto dedito sempre alla campagna.
