Innu sardu di Benito Saba
LOGUDORESU
Innu Sardu Nassionale (*)
LOGUDORESU
Sardigna, Pàtria amada!
(Marziale)
Sos Sardos siant pro Te,
Terra nostra alabada,
Sardigna, Pàtria amada,
fortza paris pro Te!
(Solenne)
1. Passados sunt sos séculos
in mesu a tantas penas,
su samben de sas venas
ispartu amus pro Te!
(Mosso)
2. Su tempus oe est bénnidu
pro su Pòpulu Sardu
de artziare s’istendardu:
semus totu pro Te!
(Solenne)
3. Lughet torra s’arbéschida
de sa Nassione Sarda:
mai ánima guvarda
siat, Mama, pro Te!
(Mosso)
4. Sa limba nostra ìnnida
cherimus faeddare
e bia l’intregare
a sos fizos pro Te!
(Solenne)
5. E cherimus deféndere
sa nostra identidade
e paris dignidade
in Europa, pro Te!
(Mosso)
6. Cun mente e coro fèrtile
dogni trabagliu umanu
modernu crescat, sanu,
siat bantu pro Te!
(Solenne)
7. Sa Terra nostra dèchida
cherimus cun sabiesa
in tota sua nidesa
amparare pro Te!
(Mosso)
8. E su Mediterràneu,
mare de libertade,
de paghe e amistade,
siat domo pro Te!
(Solenne)
9. De Sardigna su Pòpulu
est semper soberanu!
Pàtria amada, est beranu:
vida longa proTe!
Benito Saba, 2008
(*) La melodia è quella dell’antico ‘Hymnu Sardu Nationale’ “Cunservet Deus…” – 1843/44 di G. Gonella; alternare nell’esecuzione delle strofe l’andamento “Solenne” con quello “Mosso” (o Allegretto”) secondo lo spartito originale – Cagliari – Biblioteca Conservatorio Statale di Musica “P. da Palestrina”.
(Vedi www.radiomarconi.com/marconi/marcia/innu.html)
PREMIU “FRANTZISCU IGNATZIU MANNU” a sa 50ª Editzione de su PREMIU OTIERI DE LITTERADURA SARDA – 27 ‘e cabidanni 2009
Sas àteras versiones in totu sos faeddos de sa Sardigna s’agatant in su sìtiu web www.innusardu.eu
