Accademia sarda di storia di cultura e di lingua

Dae bidda in bidda di Nino Fois

1

In Ossi mi cumbidant a bustare:

puzones m’apparitzant a pienu

intro s’ischiscionera a fogu lenu.

In donzunu b’agatto, a berumia,

una gioga in logu de s’olia

a runcu fora pronta a mandigare.

E in Ossi mi cumbidant a bustare.

2

In Tissi ant affestadu sas bajanas:

ballos ant approntadu cun tiriccas,

ant ammisciadu pòberas e riccas.

Dae su fogu si salvant in pagas…

ballende sos betzittos cun sas ragas

ponent in briu féminas galanas

…In Tissi ant affestadu sas bajanas!…

3

Ant ispuntadu in Usini su binu

andende dae chentina a chentina

nde torrant a domo “in coighina”

e che caddos iscappos chena brìglia

criu nou annanghent in famìglia

e a s’annu… Bi torrant a caminu.

Ant ispuntadu in Usini su binu

4

Ballende sas bajanas de Cannedu

parent gianas de s’ena de Briai

e-i sa zente lis faghet “tai-tai”

e issas a su ballu ponent briu

che sole alluttu chi brujat s’istiu

s’areste torrendeche a masedu.

Gai ballant sas bajanas de Cannedu

5

E ti narant « Fiolinas fiore »

ca ses ricca de féminas galanas

cojuadas chi sient o bajanas

pro bellesa si faghent ammirare

e pro sabiesa si faghent amare

e sunt pro s’onestade a primore.

E ti narant “Fiolinas fiore”

6

Muros ebbia est unu trighinzu

una bidda minuda de zente bona

sa pobidda est mere, est padrona

a su maridu toccat a tzappare

sa piseddina si cherent pesare;

finas cussu est unu pistighinzu,

Muros ebbia est unu trighinzu

7

Sas carzeghesas sunt bellas bajanas

ballende in totùe tragant fogu

faghent su piga e fala a disaogu

e cantant a cantones sighidas

cun tottu sunt dicciosas e cumpridas

sunt déchidas, ermosas e galanas

sas carzeghesas sunt bellas bajanas

8

Ite narrer de sas codronzanesas

sas féminas de sa chéja de Saccarza

ballende parent puntas dae s’arza

non si frimmant ne goi e ne gai

sa chiterra non nde la sensat mai

sos coros pienende de dechidesas.

ite narrer de sas codronzanesas

9

Galana sa fémina de Piaghe

màssimu si essit in groppera…

dechìda in s’andanta e lizera

paret ballende in su caminare

e paret caminende in su ballare.

su risittu at in laras de paghe

sa Fèmina galana de Piaghe

10

A s’osilesa una matzonera

bi tiat cherrer pro la cojuare

màssimu s’est fémina de ballare

lébia est che columba bolende

at s’iscappada de s’ebba currende

finas in bidda paret furistera:

a s’osilesa una matzonera

11

Bajanas bellas che in Tzaramonte

fàtzile mi’ no est a nd’agatare

Una in milli nde podes abbojare

galana e dechida ma chen’atza,

est sa tzaramontesa bona ratza

sa mezus de totaganta s’Anglona:

paret in s’andanta una matrona

che chi esserat fiza de unu conte.

Bella sa bajana de Tzaramonte!