Sa rosa e i sa tumba de Anna Maria Sechi. Saludos a sos mortos de Anghelu de sa Niéra
Sa rosa e i sa tumba , de Victor Hugo
Bortada in sardu dae Anna Maria Sechi
Sa tumba narat a sa rosa:
De sos piantos chi s’avrèschida t’abbat
Ite nde faghes fiores de sos amores?
Sa rosa narat a sa tumba :
De sos piantos nde fato in s’umbra
Unu nuscu de ambra e de mele!
E sa rosa, dimandat a sa tumba:
Ite nde faghes tue de su chi ruet
In su fossu tou semper abertu ?
Sa tumba narat:
Fiore pianghijolu,
De ogni ànima chi mi nd’enit,
Nde fato un’ànghelu de su chelu!
Anghelu de sa Niéra
Unu saludu a sos mortos
Bos saludo totu cantos
mortos pios de Tzaramonte
totu a bois deo offero bantos
benzende a custu Monte.
Sos fiores in sas tumbas
Grogos, rujos e biancos
onore mannu cun sas trumbas
rosarios, requiem e cantos.
Si sezis cun Nostru Segnore
Nos faghides pius cuntentos
Ca como nos battides onore
e gia azis bellos appentos.
Si in su fogu de su Purgadoriu
Bos sezis purifichende
Tando pro a bois meritoriu
Est ogni ranu chi bos semus nende.
Non faeddemus de s’Inferru
Non c’at logu a Tzaramonte
Sos c’ant apid’ innoghe interru
Che sun totu in altu Monte.
Custu est bidda virtuosa
De zente bona e onesta
De sos poveros piedosa
Dae sa naschida a s’ultima festa.
Cristos at nadu chi s’amore
Pro a Isse e a sos Poveritos
Cantzellat su peus errore
E in chelu che pigamus diritos.
Animas santas de su Paradisu
Pregade pro a nois chi semus in terra
Bois chi come sezis in risu
Tenide attesu dae a nois sa gherra.
Animas de su Purgatoriu
Pro a nois pregade ogni momentu
Bos amus a narrer su responsoriu
Ogni borta chi pigamus a Cunventu.
Tzaramonte, Die de sos mortos, Sant’Andria 2015
