“Cant’est bella Toiedda” ” Giuanna e Baldoto” de Anghelu de sa Niera
TOIEDDA
Cant’est bella Toiedda
Accerad’ a su balcone
At sa conca pili niedda
E sas laras che.i s’anzone.
Issa faeddat cun totu
cun betzos e cun bajanos
sena fagher abbulotu
saludende cun sas manos
Chie la cheret isposa
Chie la cheret teraca
Paret una mariposa
Totu la cherent a faca.
No si negat a niunu
Forsis pro educatione
Ma non nd’isposat mancunu
Nen teraca a su ricone.
Toiedda est che una mela
in sa punta de sa nae
est coment’una bandela
chi perunu tocat mae
Issa est cuntenta gai
At a restare bajana
E niunu andat mai
A fagher sa serenada.
Issa est bella che-i su sole
Dat a totu meda gosu
Ma de custu non si dole (t)
At sa paghe e su reposu.
Ischit solu chi sa vida
L’at fata pro s’accerare
In carrotza est naschìda
E non podet caminare.
GIUANNA E BALDOTO
Giuanna cantu s’est bella
Cando falas a funtana
Mi pares una itella
Cantu ti tenes bajana.
Como chi tenes maridu
Mi faghes innamorare
Calchi die fidu fidu
deo ti cherz’abbojare
No t’attrives conchi macu
A falar’in funtanedda
Betadiche in su lacu
E ifriscadi sa conchedda.
In su lacu no mi eto
Ma mi eto subra tie
In sa chessa deo t’iseto
Prima chi si fetat die.
Si lu naro a Pedru meu
Tue moris che unu cane
Prima chi ti ocat Deu
Finis de papare pane.
Gai deo li naro totu
Su c’as fatu in gioventura
In conchedda ‘e tiu Brotu
In sa mata ‘e sa chijura
Tando fala cras manzanu
Cando benzo a samunare
T’ap’a tocare sa manu
Unu asu t’ap’ a dare
Gai ses tantu galana
E che su sole s’est bella
Tue falas a funtana
Ap’a tocar’ un’istella
Pedru Antoni su manzanu
In bestes de sa muzere
E cun sa resosa in manu
Saludad’a su messere.
Sas feminas de sas oto
L’ant apidu mortu male
A Bore nadu Baldoto
L’an fatu su funerale.
