Accademia sarda di storia di cultura e di lingua

Tenzo gana de vìvere

Tenzo gana de vìvere
su chi oe sa lughe
mi cuntzedit,
cando in coro m’abberit
un’ispera de gosu,
e su sero, a s’occasu,
mustrat su primu isteddu
in chelos nettos.

Sas undas de su mare
m’infundent e mi bantzigant
sa mente.
De custa terra amante
so ‘istadu,
ca l’apo forrogadu
totu su chi nos mustrat
e nos cuat,
cando nuscos impreat
po ti ligare a issa.

Apo fattu promissa
de baliare mudu
onzi dolore,
po bier su colore
de abréschidas noas
in s’aera,
e bizare in sas nottes
tèbias de istiu,
iscultande ‘e su riu
su murmuttu,
in apprettu
de nues e de abba.

Tenzo gana de vìvere
e de gherrare ancoras
cun su fadu,
ca sas dies, sas oras,
donz’istante
de su tempus presente
sunt sos mios,
mancari, po s’incras,
de sos sónnios prus
non sia mere.

Giangavino Vasco

Setzione versos isoltos II prèmiu