20 Ottobre 2021
Categoria : versi in gallurese
“Turrendi” di Maria Teresa Inzaina
Maria Teresa Inzaina
TURRENDE..
Pa trami di stritti
torru a casa di mamma
attraissendi umbri frischi e discreti
ill’azza di pultoni appena sghinti
scuri di solitudini e d’anticu.
E mi ‘icu più stedda
in sirintini arrinicati di jocu
e la sera a lu focu
azzichendi insunnita a me suredda.
E la boci di mamma è sempri chissa
e babbu ancora lu matessi:
sempri cussì mi pari l’agghju ‘isti
no socu si palchì cioani ancora
o si palchì so stati sempri ‘ecchj.
Illa carrera
solu calche vintana
ha cambiatu culori
tanti janni l’ha chjusi lu tempu
casi spinti
chen’alenu di ‘ita….
E più rari e affannnati
s’intendini li passi
la matinata chizzu
andendi a prima missa.
Una junta d’ammenti mi poltu
insarrati illu cori
e un’immagghini dulci
chi mi torra dugna ‘olta
inn’istrinta di pientu:
minnanna
a passu lentu
spuntendi appena
ill’alcu di Sant’Anna
