“Cantone a boghe de ballu” a cura de Domitilla Mannu
Rezistrada in Laerru in su 1982. S’informadora si naraiat Maria Antonia Muganu.
De custa cantone s’agatant àteras variantes, comente s’ischit onzi bidda bi ponet o nde bogat calchi cosa in sas cantones de sa traditzione populare.
Duos sunt sos coros duos
si los amas o si nono
imazina fata de oro
e chena falta niente
ispaju ses de sa zente
luna de su mese maju
de sa zente ses ispaju
de su mese de maju luna
de sas bellas acò nd’una
chi nd’ant gelu sas istellas
acò nd’una de sas bellas
chi sas istellas nd’ant gelu
giughet unu tratu ‘eru
chi totu su mundu lughet
unu tratu ‘eru giughet
chi lughet totu su mundu
su pilu doradu brundu
non mi tenzas in olvidu
in olvidu non mi tenzas
e s’amoradu mantenzas
chent’annos petus doradu
mantenzas s’amoradu
petu doradu chent’annos
si ti lughiant sos pannos
una santa mi parias
si sos pannos ti lughian(t)
mi parias una santa
sas bellas totu ti antan(t)
ca tenes su primu votu
sas bellas ti antant totu
ca su primu votu tenes
non b’at siendas nen benes
chi agualent custa prenda
non b’at benes nen siendas
chi custa prenda aguale(t)
duos sunt sos coros duos
si los cherides amare.
