“Miallina, Gildo e Thau” di Giovanna Elies
Semus in domo de Miallina, in s’apposentu. Est una domo in paris, de cussas chi s’agatan in sos platos de sas tzittades. Est tota bene ammobiliada cun ispijos, retrattos, taulinos, ottomanas, iscaffales de libaros e fiores de ogni zenia e calidade. Subra unu taulinu unu monitor e a fiancu su televisore. In custu monitor, die pro die s’est averiguada una fregura de òmine. Ha comintzadu a tenea-tenea a si che la imboligare, fina chi b’est resessidu. Miallina est una pisedda sola, isettende s’amoradu c’àt passadu su tempus. Daghi in su monitor s’est averiguada sa fregura de òmine chi, die pro die, si che l’est intradu in tzelembros chi podiat essere s’amoradu sou Issa puru cumprendet chi no est òmine intreu, mezus cussu ca no nudda.
Gildo- mòriga Miallina,mira chi appo mandadu s’aviotassi. Dainoghe a deghe minutos arrivit e tue no ses ancora preparada.
Miallina- ma itte animale àt a essere cust’aviotassi, eo no nde connosco. No appo mancu patente! Hoi, in bellu giru de maccos che so finida!
Gildo- no às a pessare de ‘enner ainoghe chentza leare s’aviotassi? Pone mente a mie, movedi. Essu cantu ses lena!
Miallina- hoi, tantu est totu in debadas, no bi la fatto: Devo agatare su tintieddu pro sas pibiristas, bogareminde sos rodulinos dae conca, resessire a mi tzaccare custu ‘estire de lamiera chi m’à mandadu, serrare sa domo e fagher aterunas cosas.
Gildo- ma.. Thau inue che las postu?
Maillina- thauadu ses e bene, cussu morottulu de ciaos no est bonu a nudda. Che l’appo isserradu in sa lavanderia.
Gildo- itte às fattu a Thau?
Miallina- eia, l’appo presu a sos iscobulos. Ello… una filippina cantepennò, una rumena ti costaiat troppu?
Gildo- Ses a s’ultimu pienu de Selene!!!
Miallina- de chie?!
Gildo- comente de chie, de Selene, bois la ciamades luna.
Mialluna- a s’ultimu pienu de sa luna s’es tue; bessinde dae cussu monitor e beni ainoghe.
Gildo-muaroc
Miallina- torrende bi ses a narrer cussas peraulas a s’imbesse. Arratza de òmine! Tue chere istudiadu pro ti cumprendere. Comente si siat, Thau ch’est affricialu e deo no bi la fatto.
Gildo- sorpresa, accò a Thau, faghedi aggiuare.
Miallina- innoramascara, cosa de ti cuare nudda est?
Gildo- sessandela e congrui, ca ti so mandende a ti leare.
Miallina- chi ti che lene a s’ospitziu, òmine de ‘edrina!
Thau- ajò, mòriga, Gildo t’est aisettende. Essi a bider si resesso a ti tzaccare custa lamiera!?
Miallina- itte asa nadu…? Lamiera?
Thau- ello itt’est si no lamiera, ma in su Rerat, inue si faghe fogu Gildo, sun de moda. Bellabè, faghedi istrinta, ca si no custa ‘estmenta ti raffiat sa pedde. Dai, aggiua, mantene s’alènu… tzaccada. Nostrsegnoramia, no cheres abbaidada. Allò chi ti ponzo sos bellettos e ingasi pares pronta pro fagher findigu.
Miallina- Thau, faeddas comente una pessone. Ello daghi a Dolce e Gabbana non los connoschen in cussu Rerat
Thau- in chilca de Dolce e Gabbana sunu, issos bestin gai. E faghe attenzione a no t’abbratzare a Gildo, nossichi puru ti fattet s’iscossa.
Miallina- Thau, Ello tue de cales ses?
Thau- eo so de inie, ma a fortza de istare cun tegus mi so abetuende a inoghe e, si m’andat bene su chi ‘itto in manu, no bi torro Ma como sessa su faeddare, s’aviotassi est arrivennde, bae e torra ca in cussu pianeta a mandigare cosa metzana pius pagi b’istas e mezus est.
Miallina- no ti creia. Tando, agabbami a sistemare custa camija de foltza, accontzami sos pilos, ponemi sos belletto e siat comente si siat.
Thau- ma.. de abberu pessas chi Gildo bi ponzat fregura! Pius malagontza bi andas e pius l’às a piàghere..
Miallina- unu mezus de s’àteru, antzis dae duos no nde ‘ogo unu ‘onu.
Gildo- Miallina, mòrigadi luego; no istes a iscultare sas ciancias de Thau; a bois in Terra piaghet a mandigare de fronte a su mare. Nois, inoghe, mandigamus de fronte a sa Terra cun sa tiazza fatta de isteddittos, às a bidere itte gosa bella, itte gosu.
Thau- arratza de gosu. Cun sos taulinos in mesu a sa renalza, cun d’unu suffogamentu de aeras e cun sa timòria chi passet calchi crastu o calchi isteddu guastede sa festa..
Miallina- de abberu?
Thau- ..ello no!
Miallina- e tando… eo no bi ando..
Thau- troppo tardi, accò s’aviotassi accostende a sa ventana; già t’isettan , ma est mezus a pigare.
Miallina- isculta thaighe’ ma… ite nde naras si cando torro no che andamus a sa pitzeria de s’Alighera e no’ mandigamus una pitza peromine de cussas a metro?
Thau- como ‘ola, daghi torras nde faeddamus..
Gildo- mi raccumando: sedi in su sedìle, ligadi ‘ene, no faeddes cun s’isciafferro e camina a benner ainoghe. Antzis no, innanti de totu serra su monitor, ca si no mi cundennas a restare in Terra.
Thau- itte peccadu diat essere, pessat Thau, indetzisu si a istudare o lassare su monitor atzesu, inciaitende pro vida cuddu pòberu Gildo
Giuanna d’Elies
