Eris in s’universidade tataresa b’est istada sa “Festa de sa limba mama”. In s’aula magna b’aiat pius de 200 pessones e b’aiat finas zente in pè. Ant porridu sos saludos su rettore, su sìndigu e s’assessore regionale Dessena (in sardu). Su coro de sos istitutos superiores tataresos at cantadu in sardu duas cantones bellas. Sas relatas fint chimbe e sos relatores ant faeddadu ebbia in limba (tres in sardu, unu in aligheresu e unu in tabarchinu). Sa situatzione no est bona ca s’abbandonu de sa limba in familia est sighende forte. Su dirigente iscolàsticu de Pèrfugas at naradu (in sardu) chi dae duos annos sa limba est insinniada a manera curriculare e veiculare in sas iscolas de s’infantzia e in sas primas duas classes de s’iscola primaria de Pèrfugas, Erula, Laerru, Martis, Piaghe e Tzaramonte e chi in sighida at a èssere insignada finas a sa 5^ impreende una parte de su 20% de sa cuota de autonomia a disponimentu de sos istitutos.
S’assessore Dessena at naradu chi sa cummissione at licentziadu su testu de una legge noa pro sa limba e chi sa RAS est investende 3,5 miliones de euros subra a sa limba. Diat pàrrere una cifra manna ma est abberu paga cosa in cunfrontu a sa Còssiga ue sa Regione ispendet unos 53 miliones pro s’amparu e s’insinniamentu de su cossu in sas iscolas e in s’universidade.