Primu de Maju de Gavinu Cossiga su Perfughesu (de Tzaramonte) di Mauru Maxia
Custu lunis chi benit est su 1 de maju, festa de su tribagliu. Oe custa die s’affestat in guasi tottu su mundu. Ma a s’incumintzu de su 1900 a faeddare de custa cosa bi cheriat coraggiu meda ca fit una idea rivolutzionaria. Custu coraggiu non mancaiat de siguru a Gavinu Cossiga, poeta perfughesu de ideales
socialistas e repubblicanos. In su 1906 isse pubblicheit una poesia intitulada propiu “Primu de Maju”. Chie cheret la podet bìdere in su situ http://maxia- mail.doomby.com/pagine/literatura-sarda.html intro de s’antologia intitulada
“Poetas perfughesos” in sa pag. 43. Pro chie at pagu tempus la ponzo finas inoghe.
PRIMU DE MAJU
(Perfugas, 1 de Maju 1906)
Ca tantos ammentos mortos rifiorire
mi sento in custa die umile e fiera
e sento s’epopea ringiovanire
e bido ’e sos eroes s’umbra severa…
Ti nat custa die: – Impallidire,
o truce borghesia, bezza pantera,
deves; e china sa tua fronte altera:
carnefice so deo, deves perire.
Intenta a goder, tue non consideras
sos chi a sos bentos gridan: – Un’aggiudu! –
da i su fundu ’e sas orridas galeras:
Martires cussos sun de s’ideale!
ei s’odiadu tou regnu distruttu
det morrer in custa die pro te fatale!…
Gavinu Cossiga
