Accademia sarda di storia di cultura e di lingua

“Marantoni” de Mauru Maxia sa ‘lettura’ de Maria Sale

Maria Sale

L’hapo legidu cun piaghere mannu su liberu de sos contos de  Marantoni, su giaju ‘e Mauru Maxia.Contos de sa vida sua chi si miscian cun sos de tota sa familia e de chie l’hat connotu.

Contos cun passazos cabales a sa vida de babbos e de giajos nostros,  sa vida difitziele, fintzas in sas cosas chi oe no han pius importantzia, ma chi, propriu cussas,  nd’hat fatu vidas istraordinarias.
Bonos pensamentos, sacrifitziu, sabiesa, coraggiu e intelligentzia manna.
Cosas  chi  Mauru nd’hat  accabidadu da-e sende minore. E bonu melèdu hat apidu in sa pensamentada de  los torrare a  bida cun sa ‘oghe  de su giaju, mancari inzomendebi fantasia e bideas sua, ma inzevinende a siguru  sos sentidos e bideas chi hat tentu su giaju sende iu.
Faeddos  e bisos chi podet  bogare a lughe solu unu nebode chi hat connotu  a fundu  su giaju sou.
E si, a vint’annos da-e sa morte, los hat cherfidos mustrare a car’a mundu b’est   giara s’affressione manna chi hat ligadu giaju e nebode.

Mauro Maxia

E si,  Mauru,  b’est  resessidu  fatendelu  in sa faeddada nadìa ‘e su giaju, cheret narrer chi sas arrejonadas de su giaju li sun imbaradas iscritas in coro e mente cun literas chi su tempus no iscolorit.
Unu lorumu de cosas bene inzomadas inue sa trama paret trunchendesi, cando passat da unu contu a s’ateru, ma inue  invece sighit cun boghe limpia  mustrende s’intritzu ‘e sa vida.
M’est parfidu guasi de intender sa ‘oghe de tiu Marantoni cun sa faeddada e-i su tragiu geniosu.
Sò torrada minore, cando intendia contos, de  vidas passadas, diventados contados.
Sa  zenerassione de babbos e giajos nostros fin, da-e pius a mancu,  omines chi  faeddaian meda, chi lis piaghiat a si “raccontare”, fin liberos abertos inue si legiat sa vida insoro e s’imparaiat a iscrier sa nostra.
E duncas, podet parrrer  chi su contu no siat nudda de ispeciale, ca est su contu de una familia che tantas, su tribagliu, su sacrifitziu, su dolore, s’amore chi mudat cun s’edade ma no sessat, sos
cumponimentos de una vida giusta, s’impastu bene dosadu chi tenet umpare sas pedras de domo. Ma cale sienda pius manna!
S’anima de totu su chi hat iscritu Mauru est su faeddare, ca tiu Marantoni si fit fatu connoscher da-e sos nebodes, no da-e cando issos sun naschidos, ne da-e cando issu est bennidu a Pejfugas ma  da-e tempos innanti ch’esseret naschidu issu e-totu, ca lis haiat mustradu tota sa raighina de sa zenerassione sua.
Cosa  chi como  non  sutzedit  piusu, sos  giajos de oe no han tempus de arrejonare a longu cun sos nebodes; lis  regalan  sa  “ pleistescion” e gai faeddan cun sos pupatzos chi bi faghen mustriàcas, ma tra issos no si connoschen piusu, hamus perdidu s’usu de su faeddu. A dolu mannu!
Chie hat capatzidade e ammentos balidos diat dever fagher che Mauru, podet esser mediu pro ardiare custu tempus fatu de irmentigu chi semus vivende e pro nos intregare in vidas benidoras. E, in issas, restare ‘ios nois puru, a pustis mortos.

Bravu Mauru e milli grascias pro m’haer fatu nadare ind’unu mare de ammentos chi, sun sos suos, ma mi  sò ‘ida deo, ind’unu sonnu bellu de ateros tempos.

Mi si cumpiago meda cun Mauru Maxia pro su liberu sou “Marantoni”.