“Chissa me’ palti d’anima” di Maria Teresa Inzaina
Pa Valentina: ogghj è lu so’…..esimu compleannu. Chista poesia la scrisi candu era cumincendi a fassi signorinetta…E inn’iddha mi vidìa eu, cu li matessi sonnii e spiranzi. Auguri fiddhola, a cent’anni!
Chissa me’ palti d’anima
( a Valentina)
Fiddhola
d’impruisu m’avvicu
chi ti sei fendi manna
e dilicati premini
frueddhi di folmi
sutt’a li ‘istiri toi.
Andarài
lu socu
attraissendi
tennari stasgjoni
e ghjà t’accendi
fochi illi puppìi
lu celu limpiu
di chista primmaera
nóa e prummissa
luciósu spantu
di frisca mela
illi to’ mani.
Cussì ancor’eu
siriàa franetichi
e inchiittugghjni dulci
brusgiendi illi pinseri
sirintini di ‘arru
troppu lenti a passà.
E abà timu
lu tempu chi curri
e lassa signi
sempri più accarrati
ma.. m’agghjuta
la to’ brama di ‘ita
palchì s’annóani
illi spiranzi tói
li mei mattessi di tandu
e insemb’ a te camina
chissa me’ palti d’anima
filmata ancora steddha.
