Sa festa de su coju deodoradu de Angheleddu e de Dometilla de Anghelu de sa Niéra
Die pro die dae cando nos semus cojuados sunt passados chimbant’annos. Andare a s’isposaliziu in su 1963 est istadu comente comporare unu bastimentu e navigare in su mare de sa vida. Su mare, gia l’ischimus, a bortas est calmu e a bortas est buliadu, a bortas est in tempesta subra totu cando si pesant sos dimonios e iscominzant a sulare a buca manna. S’omine andat a pupa e sa femina a prua, ma non b’at nudda ite faghere cando si pesant sos bentos e tando podet capitare chi unu o s’atera che ruat in mare. Naschent sos fizos, los immagnis e pustis si che olant de peresse e tando su bastimentu chi est imbetzende agatat ateros perigulos: a bortas est s’omine chi cheret torrare a gioventura, a bortas est sa femina. Est che su poema de Goethe, su Faust, chi pro torrare zovanu at bendidu s’anima a su dimoniu, dae meda onzi intantu un omine mannu o betzu cheret torrare a pitzinnu, ma est totu un imbrogliu: s’omine in custu mundu non podet torrare a pitzinnia e est che.i chie si che cheret betare dae su bastimentu in mare, si no istas atentu su mare ti che dragat cun totu su bastimentu. Bene o male, cun totu custos perigulos, deo e muzere mia amus passadu su mare calmu, su mare buliadu e finas su mare in tempesta, ma sa fide e sa manu de su Chelu nos at leadu pro sos pilos de conca e nos at servadu. Beh, a narrer sa veridade si b’est posta in mesu puru Nostra Segnora e Santu Matheu e totu sos santos chi veneramus in familia e in bidda chi in cantu a contare in Chelu sunt sos primos.
Santu Matheu de su restu at invitadu medas bortas finas a Gesu Cristu a domo sua a mandigare: mi’ inue istat sa potentzia de su santu nostru protetore. Sos tzaramontesos chi sunt malos che.i sos rajos a su puntu chi mancunu diat andare in Chelu, custu l’ischint e tando ant giogadu bene sa partida seberende in mesu a totu sos santos santu Matheu comente protetore e gai nessi duas partes de sa idda si servat siguramente, sa terza parte at cherfidu girare sas palas a su santu e tando bona note e a s’inferru cun sos dimonios conchi rujos.
Deo e muzere mia in custos chimbant’annos, bolados che un’acera de balcone, nos amus tentu affaca su santu, sa Vergine de su Rosariu ch’est in Tzaramonte e pustis santu Miale, s’arcanghelu pius importante e potente de totu su mundu soberanu (nudda bos paret) e santa Maria Maddalena, e Santa Giusta, e Santa Caderina de Alessandria, non faeddemus nemmancu de Santu Zuseppe o de Santu Giuanneddu chi los tenimus semper affaca a domo.
Pro li ogare de fune, cun custos santos pregados e invocados d’onzi die, nos semus servados su corpus e s’anima e gai est bennida sa die de de su coju de oro zecchinu e si nos fidamus de Deus e de sos santos de idda e de cussos nostros de domo de sos cales amus su nomene arrivimus finas a su coju de diamante in su 2038, frades mios caros. Custa no est buglia amigos mios e paesanos mios conchi perrinos. Unu in su perigulu de unu bastimentu comente est su matrimoniu devet invocare Deus e totu sos anghelos e totu sos santos e non fagher che sos oberaios de s’Andria Doria e de su Titanic chi aiant iscritu in s’oru de sa nave chi Deus no bi diat esser e tando che sunt falados in fundu de su mare, no ant fatu gai sos oberaios de sa Concordia e tando oe l’ant posta torra in mare ca si fit corcada.
Su bastimentu nostru partidu su 11 de settembre de su 1963 est arrividu in portu s’11 settembre de su 2013 e gai sapadu passadu amus nadu una bella missa de rengraziamentu a nostru Segnore cun duos amigos missioneris e pustis amus mandigadu a bellu a bellu chena fagher abulotu cun baranta tra fizos e nebodes e connados e sos fizos issoro, mannos e minores e como amus totu s’annu pro fagher festa cun sos amigos caros aisetende su 2038 pro su coju de diamante cando deo ap’aer 101 annu e muzere mia 94 bator annos si Deus cheret e Nostra Segnora nos faghet sa grascia!
