Gianni Denanni, su cantadore de Tzaramonte, frade de Franco, cantadore isse puru. Intervista aggolta dae Anghelu de sa Niéra
Gianni Denanni
Deo so naschidu a Tzaramonte su 27 de frearzu de su 1960 dae Cristovulu Denanni e dae Nigolosa Pileri.
Sa mia fit una familia de pastores (Sassu Altu) e istaimus in sa tanca de S’Ena e dai cando fio minore cun frade meu, Franco, chi fit pius facci mannu de a mie, nos tucaimus a cantare in sas festas de campagna, accunpagnados a chiterra dae tiu Tigelliu Mannu e calchi olta dae tiu Peppeddu Iddau, innanti a totu sos parentes. Cando ochiamus su porcu faghiamus festa finza pro una chida intrea.
Cando andaimus a sas festas meda bortas nos invitaiant a pigare a su palcu e a cantare a boghe ipalatada umpare a sos professionistas.
Frade meu fit pius facciudu e deo calchi olta pro sa timoria de sa zente mi che fuio, pero pustis ap’ imparadu deo puru a esser facci mannu e a cantare a boghe piena adainanti a sa zente. Su chi nos at permissu de cantare umpare a livellu professinisticu est istadu chi deo e frade meu aimus duas boghes divessas e un istile divessu e quindi semus andados adaenanti cun sutzessu mannu. Deo a diferentzia de frade meu meda bortas m’iscrio sas cantones chi canto dae sos palcos ca mi piaghet de esser a su passu cun sos tempos ligados a sa vida e a sos tempos bennidores. In custa manera so custrintu a m’aggiornare continuamente e a fagher versos ispirados a s’atualidade comente apo fatu pro sos oberaios de s’Asinara e cando so andadu a Sardegna Uno pro cantare otavas pro sos pastore in rebellìa.
Dae su ’99 se su seculu andadu ap’incominzadu a girare su mundu, pro no faeddare semper de su Continente, e so istadu in sos palcos de Franzia, Ispagna, Germania, Malta e poi su saltu in Egitto, Siria, e pustis finza in sos Istados Unidos, in Canada, in Argentina e in Australia.
Prof. Macchiarella de s’Universidade de Cagliari nos at invitadu a Catania e nos at fentomadu in su programma de s’istajone lirica de su teatru Pitzente Bellini de Catania e amus cantadu cun onore confrontendenos cun sos cantantes liricos de s’Opera!
Sos argumentos chi toccamus cantende sunt sia cuddos de sa civilidade sarda passada, ma como cantamus meda su presente apende in conca puru su tempus bennidore.
Sa oghe mia est tenorile , tendente a sa melodia comente sos antigos pastores chi sunt fentamados dae Virgilio, Titiro e Melibeo, e deo apo unu modu de cantare pius pasadu de sos ateros collegas ca pesso chi sa melodia devet esser guvernada dae su cantadore e no lu devet guvernare. No so eo chi lu naro, ma una borta tiu Tigelliu Mannu chi sonait sa chiterra che su mitixcu Orfeo m’at nadu, frimmende de sonare sa chiterra: -Gianni tue ses unu cantodore de classe.-
Sa zente iscultat cun vera ammiratzione e deo canto cuntentu de sas cuntentesa chi pigat dae sa zente chi m’iscultat cun atentzione, Tzerti no non pagant che.i sos trumnetistas de Jezz, bidu chi como sa Regione s’est dadu a ispraminare inari pro a isso e a nois abortas restat su fundu de sa buscica. No est giustu pero, ca in su cantu sardu b’est sa tzivilidade nostra e in su mundu su cantu nostru est apretziadu pius che in Sardigna. Ello no amus guvernantes de caveddu lebiu e s’ischit, lu narat Cristos, chi niunu est profeta in domo sua. Gai est sutzesu chi poveru tiu Gianne Seu si ch’est mortu chena esser mai premiadu in bidda sua chi como paret diventada che cantanapoli cun sagras e sagritas a mandigare e a buffare e sos cantadores andent bolende peri sas aeras. Deo pero sigo a cantare inue capitat e peri su mundu, puru si como non semper poto andare meda atesu dae domo pruite poi de vint’annos nos est capitadu chi est naschidu unu bellu fizigheddu ch’est su gosu de sa familia umpare cun sa fiza de vint’annos!
Bidu chi vosté, professò, mi los dimandat cando apo su tempus li mando calchi otava fata dae a mie, peristantu podet ponner calchi versu dae totu connotu.
In s’ortu sos bitellos
mandigant cariasa
sos ojos tuo bellos
chi mi los as promissos
nara si mi lo dasa.
I
in su monte ‘e Ghidone
bi cantat sa corroga
si non mi podes bider
sos ojos t’inde oga.
Maria pilos d’oro
si ch’est betada in mare
a piscare murena
si mi cheres amare
gito sempre unu coro
mancari in terra anzena.
In su buscu ‘e sos frassos
mi sento acurtzu a tie
muzere sempr’amada
ma tue ses che.i su nie
si ti chirco colcada
mi che pigo a sos tassos
e fozas boddo a tie.
In binza ‘e bidda noa
cantaisi fradile
custas cantones malas
como chi ses in chelu
non cantes in sas salas
si no perdes su velu.
