2 Luglio 2013
Categoria : versos in limba
Cando giamant su bechinu de Anghelu de sa Nièra
Cando giamant su bechinu
tando ses bell’ e che mortu
issu atis su baule
pro ti che tzacare intro
e no podes denegare.
Battor omines umpare
ti leant a codd’issoro
ca tue ses su tesoro
de sa die fatoria.
Cando falas in sa tumba
pro aer paghe e reposu
mi diventas putzinosu
ca su corpus s’arruinat
e poi diventas liju
che carena ‘e barca
fraziga.
Si como tue ses bellu
pessa chi diventas feu
non ti dias tantas arias.
Tue prega e sias bonu
cun sos parentes
in primu
e daeboi cun sa idda
tota canta
che in chenabura santa.
E non mandighes ambidda
ca no ti faghet eternu
lea cun moderatzione
s’ustare e sa colatzione
e ogn’intantu recumando
ista chena mandigare
pro fagher sa penitentzia
e sos pecados alleviare.
Mai perdas connoschentzia
de sos deghe
de Deus cumandos
ca si no che finis giosso
in s’Inferru e male conzu
chi no est in Putugonzu
ma in fundu a su Vulcanu.
E si puru ses galanu
sias meda religiosu
e preparadi a su gosu
de su mundu soberauu
che perfetu cristianu.
Si poi tue ses revessu
ammentadi chi as tempus
de ti fagher su protzesu
in su confessionale
ue sa miserigordia
de Deus è sempre pronta.
Ma si moris che.i. sa tonca
chena sos tres sacramentos
tando ses finidu in totu
e che falas muizende
in su fogu de s’Inferru
e finidus as de gosare
e iscomintzas a penare
chena peruna ispera.
Pro a tie ap’iscritu
custos versos,
cristianu,
leggedilos su manzanu
e su sero pro pregare.
chena mai t” indistraccare
nen a de note nen a de die.
Ammentadi chi su tempus
de si vida piena e’ gosu
passat luego che.i. s’astore
cando lassat sas alturas
pro andare a sa pastura
e gosare pro una die.
Ma si non crees a mie
cree nessi a Gesu Cristu
ch’in sa Rughe l’ana pistu
pro servare solu a tie.
