Sighimi de Giuanna Elies de Osile
Sighimi, si pro te est amore
e ti ripito sighimi
fin’a fundu, fin’a macchine
in custa terra amena cando pioet
e nues mannas passan in chelu.
Sighimi, ‘ettadi e lassadi andare
in sas currentes de su pessamentu
e lassa, frimma, frimma su corpus tou
debile debile a sas forzas mias.
‘Osi si che morin
beranos trabagliados
in pabilu brujadu de attonzu
e-i su coro, intantu, semenat
a cumpagnu su ‘entu, in sas chesuras
in s’oru de sos rios
a fiancu ‘e s’oltu
sempre in chilca de umbra
sempre prontu a si cuare.
Si pro te est amore
beni
a inue naschet su sole
in mesu a su ruju azzesu
de sos geranios de sas roccas.
Beni a sonniare, beni
a nos cuare in sas mattas de murta
padronu assolutu
de custa pobera terra in solitudine.
Beni, sighimi, passa su mare,
faghelu como
chi sas forzas t’aggiuana;
faghelu a de die,
faghelu como chi podes,
piga a su Rosariu
e in cue m’as a agatare
‘estida de festa e de fortuna
isperiende
fin’a ti sebertare.
GIUANNA ELIES
