“Mi lu naras?” de Giangavino Vasco de Bortigali
“,Mi lu naras, o mama
it’est chi depo fagher
po diventare mannu e virtuosu?”
Fizu meu diciosu,
cherio cumpiagher
custu disizu ch’in coro as a brama.
Ammenta, prenda mia,
ch’in cussos ojos tuos
sa vida ancora s’est como atzendinde;
su coro s’est tinghinde,
in custos tempos cruos,
de su colore ‘irde ‘e pitzinnia.
Ma si como sa vida
ti mustrat solu gosu,
non penses ch’at a esser semper gai;
ammèntadi chi mai
in su camminu umbrosu
as a agattare impresse calchi ‘essida.
In su tempus de crescher
po ti che fagher mannu,
as a connoscher tottu de sa vida.
Su coro tou affida,
in gosu o in affannu,
a chie amore in pettus t’at addescher.
E unu sole nou
s’at a mustrare a tie,
abreschinde in manzanos de fortuna.
A de notte sa luna,
bianca che’ su nie,
t’at a narrer chi custu mundu est tou.
Giangavino Vasco
24 aprile 2011 – 1°Prèmiu a sa III Editzione de su Prèmiu de Poesia “Su casu” – SINDIA 16 de Nadale 2012
Profilo biografico, fotografia e numerose altre liriche nel sito dell’amico
Luigi Ladu
