Accademia sarda di storia di cultura e di lingua

So pigadu a Campusantu cun muzere mia Dometilla, issa s’est lassada leare dae abbare sos fiores chi aiat collocatu a sos santos subra sa tumba de familia, deo, onzi orta chi pigo, mi fato leare dae su piaghere de caminare, de lu girare totu, de abbaidare sas familias. Parizas si che sunt mortas chena lassare fizos che.i. sos Rottignis: una bella istoria de amore cussa de Caterinaghela chi at zenneradu Carlo, Sergio, Mario; Tore, Pina e poi totu est finidu. S’istoria de su vice brigaderi Rottigni, bennidu dae continente, isposadu a Tzaramonte, mortu daeboi aer fatu chimbe fizos de sos cales duos laureados, Carlo e Sergio (custu est istadu unu brillante avvocadu de Tatari), Tore e Mario cun ateru sotziu ant batidu sa lughe a Tzaramonte in su 1927, ant fatu funzionare duos mulinos (trigu e ozu) e poi chena fizos si che sunt mortos. Fine de s’istoria, Ogni olta los cumpiango, peccadu creo chi puru sos fizos ant a esser istados bonos industriales che. i. sos babbos mancados.

S’atera istoria prinzipiada brillantemente est cudda de sos Grixones, duos meigos, unu generale meigu, s’ateru meigu a Tzaramonte, unu fizu dermatologo, cun duos mascios e una femina, de sos cales unu est mortu (masciu) sa femina no s’est cojuada, funtzionaria de Banca, ed est bajana e betza, S’unicu fizu, sa veridade, isco chi istat in Tatari, ma no isco s’epat fizos. Su generale at apidu duas fizas restadas semper bajanas, professoressas, damas de  Caridade, una est morta s’atera est pintzionada.
Puru pro custa familia mi timo chi si ponzat sa peraula fine. Fint son nobiles de Tzaramonte chi s’ant fatu onore daeboi de s’Unidade de Italia. S’atera familia fentomada de Tzaramonte est cudda de sos Falches: custa grascias a Deu at produidu fizos, professores fentomados e avocados. A parte Giosi compiladore de sos annales, pubbricados cun dinari soi dae Carolu Patatu,come notabile de Idda, totu si sunt fatos onore a iscominzare dae Battista chi cojuadu cun sa sorre de Caterinaghela Migaleddu at fatu manno e at fatu istudiare sos nebodes Rottignis bidu chi iso  no at apidu, intamen Franziscu, oculista connotu a livellu internatzionale at dadu onore a s’Italia e a sa idda sende Preside de meighina a Pavia ue ant postu finza una lapide de commemoru e su fizu Battista est istadu in s’assemblea costituente e primma ancora fundadore de sa Federatzione Catolica Univeristaria Italiana (FUCI) a Pavia cun su bennidore Paba Montini, amigu istimadu de totu sos esponentes de su Movimentu Cattoligu Italianu. A Tzaramonte no connoschent custos fatos e tando calicunu chi si cretet si permitit  de narrer i su bar chi non at fatu nudda. Su fizu Franziscu at fatu onore a su Babbu e a su giaju sende professore de diritu calonigu e de diritu cresiasticu a s’Universitade de Tatari e at ateros fizos  votados a s’avvocadura.

Iscujademi, ma a mie su Campusantu, fraigadu in su 1879, cun custas tumbas monumentales mi che faghet imbrocare in s’istoria, dallu chi deo puru in s’Universidade de Tatari mi so dadu a s’istoria. Naro unu requiem eterna a totu, bidu chi apo giradu in Campusantu cun custos pessamentos. Nostru Segnore mi perdonet! A faeddare de sas ateras tumbas e de sos ateros mortos de fama, a s’atera borta.