A palas de s’intrinu de Istevene Arru de Putumajore a cura di Domitilla Mannu
Dagh’in sa note forrojat pedinu
milli ricamos de umbras m’ammustrat,
de milli pubas sa mente nde lustrat
finas chi chinta non lughet caminu
in tzelembros b’inchendet luminu.
chi de sa vida realtade dimustrat.
Pantasimas de seda chena pesu
chi si pesant d’apretu a s’intrinu
e columant de lagrimas trainu
daghi prenetu m’addurat inchesu
e piantos dae ispigios atesu
birat in putu de segretu sinu.
Morinde sole in mares de lughe,
fiores ispannant cun nuscos d’incantu,
d’asseliu chirco nessi un’acantu
mancari cun su ‘arriu de sa rughe.
In sa matana prego chi mi giughe(t)
a su giardin’eternu de ispantu.
Benecherrer isetende de chelu
colo lenu in formigarz’umanu,
isperende chi nessi su manzanu
potat isterrere lastimosu velu
in sas peleas mias e s’anghelu
ghia segura diat a tenta manu.
Tando bolo in alas de cunfortu
che rundine torrende a su nidu,
che presoneri diciosu, bramidu
de torrar’a domo a pe’ isortu
pro acostare a seguru portu
de illacanadu padru fioridu.
Istèvene Arru est nàschidu in Putumajore inue at vividu fintzas a s’edade de 23 annos francu 3 annos colados in Casteddu Callaridanu pro congruire sos istudios. Est istadu unu dirizente parastatale, como est in pensione. Intre totu sas atividades chi faghet meressit de fentomare cussa de su volontariu pro dare azudu a poberos e malaidos. At tentu dae piseddu sa passione pro sa poesia e, dae su1978 a su 1980 at contivizadu rubricas de poesia sarda in radios tataresas. Sas poesias suas ant logradu reconnoschimentos de onzi zenia in cuncursos e prèmios in tota sa Sardigna. Dae como pagu tempus est iscriende Fintzas in prosa, pro sa cale est istadu premiadu in Samugheo e Ittireddu. In su mese de trìulas de su 2011 at pubblicadu, Bados, una regolta de poesias chi est sa testimonia de su chi est Istèvene, esta a narrer un’òmine de seru,de cultura e de bonos sentidos.
