4 Agosto 2011
Categoria : versos in limba
Sardos de Mundu de Anghelu de Sa Nièra
Popoladu est su mundu
de ses (e) miliardos
lu giramus in tundu
ca semus Sardos.
Dae s’Africa niedda
a s’America bianca
in Sardu tue faedda
in limba franca.
Inue b’est s’istudiadu
inue b’at missione
ponimus su siddadu
e su sardu sermone.
Dae s’Asia a s’Australia
giramus sempr’in tundu
leamus totu a bàlia
Sardos de Mundu.
Zenerosu e zentile
su Sardu giradore
puru senza fusile
si movet che- i s’astore.
Nos cherent sas bajanas
ca semus de peraula
e in domus de janas
issas nos narant faulas.
Semus tribagliadores
subra, suta sa terra,
ma grande amadores
finz’in sa gherra.
Zente d’ogni zenia
nos atzetat totue
ma Sardos de nadia
non imbetzamus cue.
