Sas Poesias de sos minores contivizadas dae Domitilla Mannu III
Publicamus sas poesias de sos pitzinnos de s’iscola de s’obbligu premiadas in su prèmiu de poesia ammanizadu dae sa Circoscrizione N^ 2 de Tàtari sa die 6 de martu . Ant bìnchidu totu sos prèmios una tropa de pitzinnas de Santu Lussurgiu, chi sunt istadas ghiadas dae Francesca Manca, una mastra de balia chi animat s’assotziu culturale Elighes ‘Uttiosos, nòdidu pro s’impignu in s’ammanizu de manifestassiones culturales pro sa crèschida de sa limba e de sa cultura sarda.
MENTZIONE DE ONORE
UNA NOTTE DE LUNA PRENA de Gloria Casula- 9 annos
Silènziu,
iscuru…
In su buscu
sos animales de sa notte
si cuan in sas molas.
Sos rampos de sas àlbures,
illuminados
de sa luna prena
ti appressan
comente pantamas!
Su tzìrriu de sos lupos
ti faghet fuire
in cricca de amparu.
SAS ISTASIONES E SOS COLORES de Alice Deriu- 9 annos
Sas istasiones
portan semper
sos colores infattu.
Su ‘eranu tenet su ilde
de sos ogos,
arribat s’istiu
cun su sole grogu
e sas campagnas de trigu cumpridu,
s’atonzu cun sa ettada de su sole
in color’ ‘e arantzu
ananti ‘e su marein tempesta,
s’ierru
cun su nie biancu
e sas nues de ambaghe
perdulàrias in s’aera.
UN’ AMMENTU de Federica Fiore -12 annos
Luminosu,
prenu de cuntentesa,
est cussu chi m’abbarrat,
s’ammentu
de una persona
chi cherio bene
capatze
de mi fagher visionare
canno m’abbaidat,
de mi fagher toccheddare
su coro comente unu maccu
solu canno mi carignat,
capatze
de mi fagher ‘olare
in unu logu
chi nemos connoschet,
in su biaitu mannu
inue,fintzas oe,
mi ‘enit gana
de navigare.
Como est in cue chi issu s’agattat.
