Accademia sarda di storia di cultura e di lingua

Poesias de sos minores contivizadas dae Domitilla Mannu II

Publicamus sas poesias de sos pitzinnos de s’iscola de s’obbligu premiadas in su prèmiu de poesia ammanizadu dae sa Circoscrizione N^ 2 de Tàtari sa die 6 de martu . Ant bìnchidu totu sos prèmios una tropa de pitzinnas de Santu Lussurgiu, chi sunt istadas ghiadas dae Francesca Manca, una mastra de balia chi animat s’assotziu culturale Elighes ‘Uttiosos, nòdidu pro s’impignu in s’ammanizu de manifestassiones culturales pro sa crèschida de sa limba e de sa cultura sarda

3^ PREMIU

SOS OGOS SUOS  de Mariangela Deriu – 12  annos

Ammajados
profunnos
prenos de allerghia.
A s’iscurigada
ddos abbaido,
sun sos primos isteddos
a s’illuminare.
In sos ogos suos
‘io ànghelos,
non potzo fagher a mancu
de ddos abbaidare.
Sa mirada sua
paret mi invitet
a unu ballu reale.
‘Io su munnu,
sa vida mia
paris a sa sua.
Nois duos solos
accumpanzados
dae su lughe lugh’ ‘e sos isteddos.
Ma…. mi acatto
ca sos isteddos prus mannos
sun sos ogos suos.