Cantones pro ballare pitzinnos dae Giuseppe Ferraro
Duru duru durusia
Sas campanas de cheja
Las tocant su manzanu
Su puddu cagliaritanu
Sa mela campidanesa
Su coro cando si pesa(t)
Non lu bido e non lu toco
Cariasa e barracoco
Gia bi nd’at in binza mia
A su duru duru duru
A su duru durusia.
Antoneddu Antoneddu
Sonami su campaneddu
Sonamilu a forte a forte
Chi si ch’intendat in corte
In corte de Otieri
E mela mia piberi
E mela mia granada
E a ue ses tucada
A fagher forragina
Forragina de campusantu
S’intendet unu piantu
Unu piantu de dolore
Mortu est nostru Segnore
L’ant mortu e interradu
Una lìtera at mandadu
Bene posta e ben’iscrita
Sonat sa trumbita sonat sa cadena
Maria de grascias est piena.
Comare mia comare
Imprestademi unu soddu
Chi giuto sa tzuca a coddu
E non b’at ite bufare
Comare mia comare.
Andadu so a boddire proinca
Rutu che so in su samunadorzu
A su retore puntas de puntorzu
E a sas netas su chi lis meritat
Andadu so a boddire proinca.
Beni bella a ti bagnare
A sas undas de s’amore
Ch’est bennidu unu fiore
Ch’at giuradu de t’amare
Beni bella a ti bagnare.
Beni a ballare mussitedda mia
Chi t’ap’a fagher coritu e bunnedda
E muncaloros de mafarronia
Beni a ballare mussitedda mia.
A ballare a ballare
A frazare sas iscarpas
Su mastru chi las at fatas
Gia las torrat a acontzare
A ballare a ballare.
Balla balla corrinciolu
Como chi ses in logu artu
A su vintichimbe de martu
Artzat su cucu a sa nae
Antoneddu tzapat fae
E Giuannedda su basolu
Balla balla corrinciolu.
A su tai tai tai moriscu
Sos gardianos de Santu Frantziscu
Sos gardianos de Pedra de fogu
Custu pitzinnu mi faghet su giogu
E mi lu faghet in sa contonada
Mèndula frisca e mèndula turrada
Mèndula frisca e mèndula a fiore
Corpos de fuste a su padre minore
E a su mannu pane de galera
Ca si che furat sa fèmina anzena
E che la furat dae su barconitu
A su tai tai a su tai moriscu.
