Mutos de amore a cura di Domitilla Mannu
In punta de Palai
b’at una funtana
e non sicat in s’istiu
in sa punta de Palai
rosa mia galana
pro cantu duro biu
non t’abandono mai.
Una campidanesa
non si cheret cojuare
nachi s’istat bajana
una campidanesa
si a tie non mi dana
comente ap’a passare
pitzinnia e betzesa.
Deris falende a s’ortu
m’ant cumbidadu a mele
e non podia negare
s’amore cando est postu
est rantzigu che fele
e malu a ismentigare.
Suta de tres suerzo(s)
mi so postu a drommire
e non poto reposare
su bene chi ti cherzo
ses ancora a ischire
mancari sempre umpare.
Intro de Tzaramonte
ch’est unu bellu paese
b’apo giogadu a nie,
pro marchese ne conte
coro non lasso a tie
intro de Tzaramonte
coro non lasso a tie
pro conte ne marchese
b’apo giogadu a nie
ch’est unu bellu paese
coro non lasso a tie
pro marchese né conte.
