A pes de s’altare de monte d’Accoddi di Nino Fois
E semus torrados
a trumas
sutt’a s’ispantu de sos isteddos
in custa notte iscura
trumentada
fizos de una Terra peleada
a pes de s’altare
a pes de custas pedras
antigòrias beneittas
a suer dae sas tittas
de Mama Sardigna
sa sabidoria chi mannos
at fattu sos mannos nostros.
Nois
ratigheddos
de unu chercu manantiale[1]
dae su bentu bantzigados
de sa malasorte
sutt’a su piantu
de sos isteddos…
Semus torrados
a trumas
a pes de s’altare
pro abboghinare a cantu podimus
su dolu
chi sas aminas
nos est allizende.
Dae cust’altare a sas aeras
chi pighet su piantu
de custa Terra Nostra
e si mudent sas lagrimas
in lentore
e falet dae sa luna
a sos coros pedrales
de frades traviados
pro chi torret
in sas laras affrizidas
su risu de su beranu
08.07.2000 Nino Fois
[1] Manantiale = perenne
