Frades de tita de Mario Unale
Istoria e contos
Intra Otto e Noighentos s’agataiant familias mannas in sas cales sa mama non solu deviat allatare sos fizos, ma calchi olta calchi fizu anzenu. Custu podiat essere de familia poverita o de familia rica. Su motivu: sempre bi sunt istadas mamas chi pur’apende fizos no aiant late e tando si domandaiat su piaghere a cuddas mamas de late abbundante, chi totu giamaiant : – Mamas de late- e sos pitzinnos- fizos o fizas de late-
Custos contos, dae a mie iscritos, si podent legere subra google in su link archeologosardos.
In su millienoighentovintiduos su tempus fit difitzile pro totu. Sa zente proprietaria no aiat tantos pensamentos a campare sa familia, cosas chi invetze, aiant sas familias cun tantos fizos e perunu bene arribadu. Tia Furica fit cojuada cun Pedrantoni, unu zoronateri chi si prestaiat a totu sos trobaglios, e aiant bator fizigheddos minores de edade, naschidos guasi unu fatu a s’ateru. Sas dies che cabulaiant cun tantos pensamentos: a lis dare a mandigare, a los bestire e a los calzare. “Iscurzu e famidu s’istat male” istaiat pensende Pedrantoni, bona parte de sa die, cun sas manos aintro sas busciacas, meledende pro su mezus, meda pius de totu in ierru cando sas zoronadas fint pagas e nudda.
Donna Imelda, nobile, fit cojuada cun don Vincenzo, su pius ricu de idda, de discendentzia nobile issu puru, e no aiant perunu fizu, ca sa preneta gai aiat detzisu.
Una bella die donna Imelda andeit in continente, a “faghere una cura”, naraiant sas teracas ei sos giualzos, ispartighinados in sos tantos giassos. Daeboi de pagu tempus resteit raida e torreit a bidda sua pro s’illierare. Sa cuntentesa de sa familia fit manna pro su naschimentu de sa prozenia, solu chi Donna Imelda s’aciapeit chentza late in titas cando enzeit su mamentu de su naschimentu.
-Ei como comente amus a fagher! Vincenzo mio il bambino deve avere il latte materno, ma io sono sfortunata!-
-Non ti preoccupare mia adorata- Vincenzo la strinse delicatamente a se.
-Giama a compare Pedrantoni chi lu chelzo faeddare, e chi enzat subìtu cun sa muzere- narat su don trofighendesi sos mustatzos a sa teraca anziana.
-E ite at a cherrer compare? Gai a ipresciu? – Furì!!, aiò mudadi chi semus andende- narat Pedrantoni a sa muzere.
Su palatu de su Don fit mannu, su pius mannu de idda, e de sas biddas vicinas. Chimbe iscalinas mannas in s’intrada, e subra in s’isserru custa colora manna allorigada a unu truncu de alvure rica de fruture, tota fata in granitu de Gaddura –
B’aiat meda zente a teracare in sue donna Imelda: in cosina unu profumu de cosas bonas chi ti lassaiant sa saliedda in buca, e unu fogu mannu in sa tziminea, sempere allutu, cun coighinas de chessa.
“Unu caldu gai, ch’in domo nostra mancu de istiu!- faghiat Pedrantoni in mente sua – In domo mia, musgheddu e ateros fiagos de miseria, emmo!! de famine!!!…. cun sos pitzinnos sempere pianghende cun sos canales de su mucu dae sas pinnas de nare!! »
Sa teraca pius antziana, chi bi fit a servire dae cando fit criadura, naraiat sa zente, chi fit fiza de su babbu de don Vincenzo, aberit sa janna de s’apusentu mannu, pienu de mobiles e de cadreones, cun sos muros pienos de quadros de sos ajos, chi cosa gai non bi nd’aiat mancu in cheja manna.
Don Vincenzo si parat reu reu, in su chitzolu de s’apusentu, ue su pagu lugore de sa die incrisada, lu faghiat parrer pius mannu de su sou naturale. Chentza mancu saludare ne isetare saludu dae niunu comintzat s’arrejonu :
– Apo pensadu de ti nomenare fatore in su petzu de “s’iscia”, de tres una, de tota canta s’incunza.Invetze muzere tua benit a domo mia a nos faghere a mandigare- narat su don trasginende unu pagu s’anca dresta, mesu topa, e sempere trofighendesi sos mustatzos, chei cussos de su re, mentere chi donna Imelda a conca grusciada fit carignende una criaduredda bianca chei su nie, aintro unu bantzigu de linna indeorada, cun sos lentoleddos de seda ricamados a pibiones.
A Pedrantoni e a Furica s’abbelzeidi su chelu pro s’ispantu ca pruite no s’isetaiant tantu, fintza ca pruite su fentomu dei cussa familia fit “….de una familia nobile, meda rica, ma avaros..”
-Emmo don Vincè – ch’esseit cun d’unu filareddu de oghe Furica, chi rispondeit puru pro Pedrantoni mudu che truncu, ma meda cuntentu de su propositu de su don.
– Solu chi mi devides faghere unu piaghere mannu- continuat su don – daghi as preparadu s’ustare deves dare a suere a fizu meu, nessi pro bator boltas a sa die, e daeboi ti che giughes unu piatu de alimentos avassados a fizigheddos tuos chi mi parent unu pagu male atriminidos-
-Mancarri siant chimbe e ses boltas, donna Imèlda mia!!; grascias a Deus, ateru mi podet mancare, ma su late in titas gia est bundante-
Furicchedda fintza dae cando fit bajana, s’idiat dae lontanu, curumi manna cun duas titas cantu una covuledda. Fit nodida in mesu a sa cumpanzia; no bella ma amprosedda e de culoridu bianca ruja.
Gai si feteit su cuntratu: pro idda Furica, e pro campagna Pedrantoni.
Onzi die, daeboi chi ustaiant sos segnores, tia Furica in domo sua, aparitzaiat sa mesa, chi impreaiat a suighere su pane, ei sos fizos faghiant una festa manna cun tanta cosa de mandigare, mancarri chi sa tziminea fit pagu alluta cun sos duos titoneddos tintieddosos, sempere sos matessi, pagu atzesos.
-Istadebos chietos fizos mios chi mama est andende a dare a suere a fradigheddu ostru de tita –
Pagu tempus apoi tia Furica resteidi torra raida, ancora dende a suere a Antoneddu sou e a su signorinu.
Su fritu aintro sa cosina bi fit che in carrela, ca totu fit a carr’a cobertura, ei sa janna ei sa poltetas de su balcone su bentu la zanzigaiat che bandelas, ma como Pedrantoni, dae s’iscia carraiat barrios de linna alluminzare e coighina a cantu nd’andat pro fagher fogos mannos comente in domo de su padronu. Sas criadureddas iscultzas ma atatas, a culu nudu cun sa pedde frasellada dae s’abba frita, istaiant currende e gioghende a tichirrios tota manna die, allegros che ciciri.
– De ite ti deves lamentare Furi’!- sos fizos sunt benes de Deus, ei como in domo nostra non che mancat nudda-
