Accademia sarda di storia di cultura e di lingua

Noina de Nadale di Nino Fois

Su Re est a proa a bènnere benide a l’adorare

Su Re est a proa a bènnere benide a l’adorare

1) Allegradinde fiza ‘e Sion

e gosa meda fiza de Jerusalem

eàllu Donnu Nostru at a bènnere

e-i sa die b’at a esser lughe manna

e ant a brotare sos montes dulcura

e at a currer latte e mele in sos montijos

ca at a benner s’ampàru nostru

chi at a rennoare Ierusalem.

Su Re est a proa a bènnere benide a l’adorare

2) Eàllu benit Deus

ómine de domo ‘e David pro si sere in trona

l’azis a bider e nd’at a gosare su coro ‘ostru

Su Re est a proa a bènnere benide a l’adorare

3) Eallu Donnu ‘enit amparu nostru

Santu Israel

Sa corona ‘e su Regnu gighet in conca

e at a dominare dae unu mare a s’àteru

e dae su riu finas a sas làcanas de sa terra.

Su Re est a proa a bènnere benide a l’adorare

4) Eàllu s’at a parrer Donnu

e no at a faltare

si isse imbarat l’as a indùlghere

ca at a benner e no at a tardare

Su Re est a proa a bènnere benide a l’adorare

5) At a pioer su Donnu che abba subr’e sa terra

in cussas dies at a nascher sa giustìssia sua

e-i sa bundanscia de paghe

E l’at a adorare donzi re de su mundu

sos póbulos l’ant a iuvare ( servire )

Su Re est a proa a bènnere benide a l’adorare

6) Nos at a nascher unu nignu e l’ant a narrer Deus forte

isse s’at a setzer subr’e su tronu ‘e David babbu sou pro imperare

e-i su podériu l’at a tènner subr’e palas

Su Re est a proa a bènnere benide a l’adorare

7) Betlem bidda de Deus Soberanu

su printzipe as a dare de Israel

e-i sa nàschida sua est de su comintzu ‘e sas dies e de s’eternidade

e at a esser glorificadu in mesu de sa terra intrea

e paghe at a esser in mesu nôstru cando at a benner

Su Re est a proa a bènnere benide a l’adorare

8) Cras nd’at a ruer sa malesa de sa terra

e subr’e nois at a regnare su Salvadore

Su Re est a proa a bènnere benide a l’adorare

S’ALLEGRENT SOS CHELOS

(LAETENTUR COELI)

1 S’allegrent sos chelos e goset sa terra

dilliriade de ajubòre o montes

2 porrùmpant in cuntentesa sos montes

e-i sos montijos in giustiscia

3 Ca at a benner su Donnu Nostru

e at aer dolu de sos poverittos suos

4 Lentorade chelos dae subra e dae sas nues pioat su Giustu,

s’abberzat sa terra e brotet su salvadore.

5 Ammentadi de nois, Segnore.

e bisitanos cun sa salvesa tua

6 Ammustranos, o segnore, sa misericordia tua

e dànnos sa salvesa

7 Imbìa, o Segnore, dominadore de sa terra,

dae sa pedra de su desertu a su monte de sa fiza de Sion

8 Beni a nos liberare, donnu Deus de sa vertude

dannos sa cara e amus a esser salvos

9 Beni, Segnore a nos bisitare in paghe

pro chi gosamus a ojos a tie cun coro ladinu

10 Pro chi connoschemus, o Segnore, in sa terra sa carrela tua,

inter a tottu sos pobulos sa salvesa Tua.

11 Torra a ischidare, segnore, sa potentzia tua

e beni a nos salvare

12 Beni, Segore, e non bistentare

perdona sos dilitos de su pobulu tou

13 Ahi, si tias cherrer isperrare sos chelos e falare

a cara a tie sos montes si tiant isòlvere

14 Beni e ammustranos sa cara tua o Segnore

Tue chi istas subr’e sos Cherubinos

15 Gloria a su Babbu e a su Fizu e a s’Ispiridu Santu

comente a su comintzu, como e sempre, in sos seculos de sos seculos. Amingesu

Su Preideru o cantat o resat

Antitzipadore intrat pro nois s’anzone sena mancia *

est satzerdote mannu cunfromma a s’ordine de Melchisedech,

in eternu e in sos seculos de sos seculos.

Isse est su Re de sa Giustiscia

e s’erentzia sua non finit mai. Grascias a Deus

UNA BOGHE GIARA

(EN CLARA VOX)

una ‘oghe giara ‘enit

s’iscuru a ilgiarire

e-i sos sónnios fuene

da’ chelu si paret Gesus.

Mi’ s’anzone imbiadu

a pagare su depidu

tottu paris cun lagrimas

perdonu li pedimusu.

Su ch’at fattu sos seculos

de teraccu s’est bestidu

liberende sos ómines

Isse ómine fattu s’est

Casta de sa mama in s’ulva

intrat divina gratzia

s’intragna de s’ajāna

su segretu costoit

E-i cuss’ ulva purissima

de repent’est tempiu ‘e Deus

chena connoscher ómine

su Fizu nos intregat

A Donnu Deus siet gloria

e fin’a su fizu solu

s’Ispiritu Paràclitu

pro seculos e seculos

Amingesus

Tillade chelos dae subra e pioat su Giustu dae sas nues

s’abberzet sa terra e brotet su Salvadore

ANTIFONAS A SU MAGNIFICAT

16 de Nadale

Antifona T.4

Su Re at a benner

Donnu ‘e sa terra

isse nd’at a leàre su iugu

de su cautivériu nostru

MAGNìFICAT

S’anima mia magnificat su Segnore

e si nd’allegrat s’Ispiritu meu

in Deus salude mia.

Ca at sebestadu s’umilidade de s’anchilla sua

allu chi pro custu a biada m’ant a narrer

tottu sas zenerassiones.

Ca a mie m’at fattu cosa manna su chi est potente

e santu est nomen sou

E-i sa misecordia sua dae zenìa a zenìa

subr’e sos chi lu timent

Sa fortza at manizadu de su bratzu sou

ch’at isantiadu sos superbos in sos sentidos de su coro issoro

Nd’at faladu sos potentes dae sa sea

e alabadu at sos umìles

At acculumadu de benes sos famidos

e-i sos riccos ch’at dispacciadu a manos bóidas

At amparadu a Israele servidore sou

ammentendesi de sa misericordia sua

Comente aiat imprommissu a sos mannos nostros

a Abramu e a su sèmene sou in sos sèculos

Gloria a su Babbu e a su Fizu

e a s’Ispiridu Santu

Che-i in su comintzu, como e sempre

e in sos sèculos de sos sèculos. Amingésu.

ANTIFONA

SA DIE 17

o Sapientzia

chi dae sas laras de su Soberanu as brotadu

finas a sas làcanas estremas

cun fortza e suavidade tottu ammanizende

beni a nos inzitare su caminu de sa prudentzia.

Magnificat…

Antifona

sa die 18

O Segnore e ghia de sa domo de Israele

chi ses cumpàrfidu a Mosè in fiamas rujas de fogu

e in su Sìnai l’as dadu sa legge

beni a nos redìmere

cun su bratzu istérridu

Magnificat…

Antifona

sa die 19

Raighina de Iesse

chi ses a insigna de sos pobulos

addenanti tou s’ant a cagliare sos res

e-i sa zente t’at a avocare

beni a nos liberare e non bistentare

Magnificat…

Antifona

sa die 20

O matzuccu de David

e bacchiddu de sa domo de Israel

chi abberis e nemo serrat,

serras e nemo abberit

beni e libera su presoneri dae presone

ue est istérridu in sas tenebras

e in s’umbra de sa morte.

Magnificat…

Antifona

sa die 21

O lughe eterna naschende

e sole de giustiscia

beni e allughe sos chi sunt in sas tenebras

e in s’umbra de sa morte.

Magnificat…

Antifona

sa die 22

O re de sos pobulos

e dae issos disizadu,

pedra de assentu

chi duos pobulos annanghes in dunu,

beni e salva s’omine

chi as fattu dae su ludu

Magnificat…

Antifona

sa die 23

O Emmanuel,

Re e Zuìghe nostru,

bràmida de sos pobulos

e salvadore insoro

beni a nos salvare

Donnu Deus nostru.

Magnificat…

Antifona

sa die 24

Cando at a esser naschìdu su sole in su Chelu

azis a bider su Re de su Regnu

benzende dae su Babbu

chei s’isposu chi si nde falat dae su corcadorzu sou.

Magnificat…

tz: Su Segnore siet cun bois

pob: E cun s’ispiridu tou

OREMUS

Coita, Segnore e non bistentare e imprea pro nois s’azude de sa grascia tua soberana pro chi sos chi cunfidant in sa piedade tua sient cunfortados dae su consolu de sa bennida tua.

Tue chi ses Deus e vivis e regnas cun Donnu Deus, paris cun s’Ispiritu Santu, dae inoghe a tottu sos seculos.

Amingesu.

AJÒZI FIDELES

(ADESTE FIDELES)

Ajòzi, fideles

cuntentos, triunfantes,

benide, benide a Bêtleem:

Nadu mirade

su Re ‘e sos Anghèlos!

Benide a l’adorare,

benide a l’adorare,

benide a l’adorare a su Segnore Gesus.

Accò, lassant s’ama

a su lacc’ umìles

finas sos pastores s’accûrtziant;

a su dicciosu

addaju nos tuccamus!

Benide a l’adorare,

benide a l’adorare,

benide a l’adorare a su Segnore Gesus.

n.b.

Apo traduidu sa Noina de Nadale in sardu logudoresu pro istare pius accurtzu a su latinu de cantu sa limba italiana e pro ondrare, valorizare e ingranzeare sa limba de sa Terra mia.

Intrego custu tribagliu meu a tottu sos sardos cristianos chi ant fide e rispettu siet pro sa Chéja Cattolica chi pro sa limba e pro sa cultura de Sardigna.

Nino Fois